ECHO (Emergency and Community Health Outreach) tau tsim muaj los tshaj tawm lus qhia txog kev noj qab haus huv thiab kev kaj huv thaum muaj xwm txheej ceev thiab thaum ho tsis muaj xwm txheej rau cov tib neeg uas paub lus Askiv tsis tshua zoo. ECHO xav cuag kom tau tib neeg coob li coob tau kom tshaj tau cov lus tseem ceeb no. Yog li ntawd nws thiaj tshaj lus qhia rau ntawm Web, rau TV saib (ECHO TV), raws cov koom haum hauv zos (ECHO Fax) thiab hauv xov tooj raws ECHO Phone.

ECHO phone, 1-888-883-8831, muaj lus qhuab qhia zoo siv txog kev noj qab haus huv thaum uas tsis muaj xwm txheej ceev hauv zos lossis thoob plaws xeev. Cov lus qhuab qhia no yog piv txwv li qhia txog tias yuav ua li cas thiaj li tsis muaj mob thaum uas ntuav thiab zawv plab lossis vim licas yuav tsum tsis txhob mus kov tej qaib, os lossis lwm yam noog yog yus mus ncig cov tebchaws Asia, Europe lossis Africa.

Koj xaiv tau ECHO Phone cov lus qhia txog kev noj qab haus huv hais ua 10 yam lus: Spanish, Hmoob, Somali, Lao, Khmer, Vietnamese, Russian, Arabic, Oromo lossis English. Nws tsuas siv sijhawm ob-peb feeb los mloog cov lus qhia xwb. Thiab koj mloog tau lus qhia txog tias cov ntsiab lus yuav tham tshiab hauv ECHO TV yog cov twg. Yog nyob hauv Minnesota hu tuaj ces hu dawb xwb. Sim hu: 1-888-883-8831.

Thaum muaj ib qho xwm txheej ceev hauv zos lossis thoob plaws lub xeev, ECHO Phone yuav tshaj tawm lus qhia txog xwm txheej kom thiaj pab tau koj thiab koj tsev neeg nyob kaj huv thiab nyob zoo. Cov lus qhia hais ua 10 yam lus yuav muab kaw tseg rau tus xov tooj thiab yuav nquag tshaj tawm cov lus tshiab.

 Subscribe to ECHO Phone Updates